काठमाडौं । सरकार विरोधी प्रदर्शनमा भाग लिएको भन्दै सर्वोच्च अदालतले मृत्युदण्डको सजाय खारेज गरे पनि इरानी एक व्यक्तिको जेलमै मृत्यु भएको छ ।

महसा अमिनीको मृत्युपछि देशभर सुरु भएको विरोध प्रदर्शनका क्रममा गत वर्ष जवाद रुही पक्राउ परेका थिए ।

३५ वर्षीया रुहीलाई कारागारमा मस्तिष्कघात भएको र प्रभावकारी उपचार नपाउँदा मृत्यु भएको अधिकारीहरूले बताएका छन् ।

रुहीको मृत्युमा अधिकारी जिम्मेवार रहेको मानवअधिकारकर्मीहरुले बताएका छन् ।

“दुर्भाग्यवश, मेडिकल स्टाफको प्रयासको बाबजुद रुहीको मृत्यु भयो र उनको मृत्युको कारण पत्ता लगाउन कानुनी मुद्दा दायर गरिएको छ,” इरानको न्यायिक प्रक्रियासँग सम्बन्धित समाचार वेबसाइट मिजानले बताएको छ ।

यद्यपि, बिहीबार आधिकारिक घोषणा हुनुभन्दा एक घण्टा अघि, धेरै मानवअधिकारकर्मीहरूले रुहीको मृत्युको घोषणा गर्न सामाजिक सञ्जालमा गए र न्यायिक र सुरक्षा अधिकारीहरूलाई उनको “हत्या” गरेको आरोप लगाए।

गत वर्ष इरानको नैतिकता प्रहरीको हिरासतमा २२ वर्षीया महसा अमिनीको मृत्यु भएको केही दिनपछि रुहीलाई पक्राउ गरिएको थियो ।

महसा अमिनीलाई ‘उचित हिजाब’ नलगाएको भन्दै इरानको नैतिकता पुलिसले हिरासतमा लिएको थियो र त्यसपछि हिरासतमै मृत्यु भयो। त्यसपछि सरकारविरुद्ध जनता सडकमा उत्रिए ।

रुहीलाई प्रदर्शनका क्रममा कुरान जलाउन र सरकारी सम्पत्ति नष्ट गर्न दंगा गर्नेहरूलाई नेतृत्व गरेको आरोपमा दोषी ठहर गरिएको थियो। तर, उनको प्रदर्शनमा सहभागी साथीहरुले सार्वजनिक गरेको भिडियोमा उनी नाचिरहेको देखिन्छ ।

एम्नेस्टी इन्टरनेशनलले रुहीलाई कोर्रा लगाइएको, चिसो तापक्रममा राखिएको र उनलाई स्वीकार गर्न बाध्य पार्न विद्युतीय झटका दिएको बताएको छ ।