काठमाडौं - नेत्र विक्रम चन्द 'विप्लव' ले नेतृत्व गरिरहेको नेपाल कम्युनिस्ट पार्टीले पूर्व माओवादीलाई एकै ठाउमा ल्याउने गरि गृहकार्य गरेको छ। विप्लव समूहका शीर्ष नेताहरूले नेकपा माओवादी केन्द्रका अध्यक्ष प्रचण्ड र जनता समाजवादी पार्टी नेपाल (जसपा) का संघीय परिषद् अध्यक्ष डा.बाबुराम भट्टराईसँग भेटेर एकता प्रयास गरेका हुन् ।
महासचिव नेत्रविक्रम चन्द (विप्लव) को निर्देशनमा शीर्ष नेताहरूले प्रचण्ड र डा.भट्टराईसँगको भेटलाई तीव्रता दिएका हुन् । विप्लव समूहका प्रभावशाली नेता धर्मेन्द्र बास्तोलाले शनिबार माओवादी केन्द्रका अध्यक्ष (प्रचण्ड) सँग भेटेका छन् ।
तत्कालीन ‘सहयोद्धा’हरूबीच शनिबार प्रचण्ड निवास खुमलटारमा भएको भेटमा समसामयीक राजनीतिबारे छलफल भएको जनाइएको छ । प्रचण्डलाई भेट्न बास्तोलासँगै उदयबहादुर चलाउनेसमेत प्रचण्ड निवास पुगेका थिए ।बास्तोलाले प्रचण्डसँग प्रगतिशील संयुक्त सरकार, जनमत संग्रह र वैज्ञानिक समाजवादलगायत विषयमा छलफल भएको जनाएका छन् ।
समसामयिक राजनीति, विघटित अवस्थामा रहेको प्रतिनिधिसभा र संसदीय व्यवस्थाको औचित्य र यसमा नेपाल कम्युनिस्ट पार्टीले समाधान दिन प्रस्ताव गरेको साथै प्रगतिशील संयुक्त सरकार, जनमत संग्रह र वैज्ञानिक समाजवाद लगायतका विषयहरूमा प्रचण्डसँग सौहार्द छलफल भएको बास्तोलाले बताएका छन् ।
यसैबीच बास्तोला र चलाउनेले बुधबार डा.भट्टराईलाई पनि भेटेका थिए । भेटमा समसामयिक राजनीतिक विषयमा छलफल भएको बास्तोलाको भनाइ छ । डा.भट्टराई निवास टोखामा भएको भेटमा जसपा नेता भक्तबहादुर शाह पनि सहभागी थिए ।
