नेपाल कम्युनिष्ट पार्टी (नेकपा) अध्यक्षद्वय केपी शर्मा ओली र पुष्पकमल दाहाल 'प्रचण्ड' सहमत भएका छन् ।
हिजो प्रधानमन्त्रीसमेत रहेका अध्यक्ष ओलीलाई भेटेर कार्यकारी अध्यक्ष प्रचण्डले गौतमलाई राष्ट्रिय सभा सदस्य बनाउन आग्रह गरेका थिए ।
एक सचिवालय सदस्यले भने, 'प्रधानमन्त्री ज्यू पनि सहमत हुनु भएको छ । कार्यकारी अध्यक्ष प्रचण्ड पनि गौतमलाई राष्ट्रिय सभा सदस्य बनाउन सहमत हुनुहुन्छ । त्यसैले आज दिउँसो ३ बजे बस्ने सचिवालय बैठकमा यो विषयले औपचारिकता पाउनेछ ।'
गौतमलाई राष्ट्रिय सभामा लैजाने सहमतिसँगै अब मन्त्रिमण्डल पुनर्गठन कसरी गर्ने भन्ने विषयमा प्रधानमन्त्री ओली अनौपचारिक छलफलमा जुटेका छन् ।
अझै पनि अन्य विकल्पबाट भएपनि अर्थमन्त्री डा. युवराज खतिवडालाई राष्ट्रिय सभा सदस्य बनाउने ओलीको चाहना छ । तर, उपाध्यक्ष गौतमले भने आफू उपप्रधान तथा अर्थमन्त्री बन्नुपर्ने बताएका छन् ।
उपाध्यक्ष गौतम राष्ट्रिय सभामा जाने भएपछि अर्थमन्त्री खतिवडा बाहिरिने भएका छन् । उपाध्यक्ष गौतमले हिजो बेलुकी प्रधानमन्त्रीसमेत रहेका अध्यक्ष ओली र पार्टीका कार्यकारी अध्यक्ष प्रचण्डलाई भेटेर राष्ट्रिय सभा सदस्य बनाउन आग्रह गरेका थिए ।
आज बिहान ओली र प्रचण्डबीचको फोनवार्तामा गौतमलाई राष्ट्रिय सभा सदस्य बनाउन दुबै अध्यक्ष सहमत भए । त्यसै अनुसार थप छलफल गर्नुपर्ने भन्दै बिहान ११ बजेका लागि तय भएको नेकपा सचिवालय बैठक दिउँसो ३ बजेसम्मका लागि स्थगित गरिएको स्रोतको भनाइ छ ।
